ابعد ما اريدك شوفتني الضيم

ابعد ما اريدك شوفتني الضيم

صدّك من عرفتك كلبي ما مرتاح

حسّبتك ورد بس شو لكيتك شوج

لان ما اشوف وردك بالعطر فوّاح

قفل كلبي قديم او سره ما مبيوح

قفلك ليش يرهم بيه اي مفتاح

زرع عمري يبس واتنطريتك ماي

او تدري انت الزرع شيسوي بالفلاح

علي زفت مناجل تهد خايب ليش

او تبيدرني ابكرابه او تنكلب مرواح

ياخورة جذب شكت اشراع الروح

عاكه انه ابعشرتك تدري مو سبّاح

شفت دمعك نزل واتحولت منديل

غشيم او ما دريت الدّرسك تمساح

يل بيتك خرابه اشوهدناني اوياك

مو بس شبح واحد بيها شفت اشباح

ابنفق اظلم اسوهي او انت عني ابعيد

صار اسنين امشي او ما كو بيه ضي لاح

امس روج السفينه الصوج ينذب بيه

من يمشي ابمغثه او يخبص السباح

بس من جربيتك نفضّيت الزيج

عرفت الصوج كله ابدفعة الملاح

يامزنة دغش مرت ابحر الصيف

لابالجذب فيّت والسموم ارياح

اذكرك من طحت صرت الك كومة ريش

اشمالك من طحت بضلوعي صرت ارماح