مو كلمن فتحلك بابة يهواك

[size=18]الاصدقاء
نائل المظفر
مو كلمن فتحلك بابة يهواك
ولاكلمن يكرهك بابه ينسد
أكو مسدود بابه وكلبه مفتوح
وأكو مفتوح بابه وكلبه أسود
أذا طشيت صحبانك على الماي
أثكلهم وفه الجواك يركد
وأخففهم يضل طافح على الرك
يروح ويه الجزر ورجعه المد
أذا محتار سافر تعرف الناس
منو يزت القطار ويوكف أزيد
أكو تشده بحبل ويكطعة ويروح
وأكو بكلمة شرف عالسكة ينشد
وأكو بمشية قطارك عينه تحتار
وباللحضة الاخيرة وياك يصعد
وأكو يشيل المحطه وية القطارات
ويدكهه على صدرة وكلبة ينسد
فرق بين اليعبدك بالمحطات
وفرق بين البناك بكلبه معبد
لاتامن بشر من طينه مخلوق
بس أرباطعش طينة محمد
موكلمن ضحكلك منة ترتاح
ترة ناب الضبع كل ضحكة ينحد
ولاتحقد على كلمن يبجيك
أذا دمعك طفح صدكني تبرد
البشر دلة ويفور بداخله الضيم
أذا يطفح دمع نيرانه تخمد
ولا تحقد على الصعدوا بلا جناح
معروف الصقر لو جنحة ينشد
ومو كلمن نزل يتسمه مذلول
ولا كلمن صعد يتسمه أمجد
أكو صاعد رغم ما هو عالكاع
وأكو نازل يضل لو قمة يصعد
راسك منتصب أعلى من الايدين
بس من السهل تتناوشة اليد
أذا عندك جبل خلهم يصعدون
فرق بين الصعد والراد يصعد
أكو يهده الجبل لو هد الجفوف
وأكو يهد الجبل لو جفه ينهد
وعلى المبرد كفر تنغر السيوف
لان سيف على سيف بكلبه ينحد
وأذا عنهم رحل كلهم يخسرون
شني نفع السيوف بليه مبرد
وما يرحل كذب مو خاف يعمون
يضل السيف تالي بكصبه ينحد
أذا تعزف لحن ويذمك أنسان
لاتكطع كمانك صعب ينشد
مرات اللحن ما يطرب الناس
ومرات البشر ذاناته تنسد
ومرات اللحن تطربله طرشان
بس طبع اليسمعك زور يشهد
على البلبل يكلك منكر الصوت
وأذا ينهك حماره يصيح غرد
أذا حجيك حكم وتخاطب الناس
كل راس على كده وياك ينشد
لان روس البشر عكس الفراغات
كلما تنترس تسوعب أزيد
وأذا تحجي ويرد صوتك كما كان
يعني اليستمع فارغ مجرد
صوتك مايرده الراسه متروس
لان بس بالفراغ الصوت يرتد
أذا ضيمك كبر لاتحجب العين
وتشوف الدنيا كلها بلون أسود
منو بهذا الوكت ما غيره الضيم
حته بيوم الاحد ماكو أحد
لكن لانضل تحسب توابيت
أنه كبلك علي صب أسود العد
رفعت راسي وكمت أحسب بالاعراس
على خشم السواد الابيض أمتد
ولو غثني الطفل من شفته بالعيد
يشل بجروح ثوبه ودمعه عالخد
بس أنه فرحت جي جتي الاطفال
ومسح كل الدموع وراح عيد
علمنه الطفل يصبر على الضيم
وطلع منه الطفل أيمانه أزيد
أريد أطرح قضيه وأنتم أسلام
وأريد أسأل جمعكم وأطلب الرد
بنيتوا شكد معابد كلهه عالكاع
منو البيكم بناله بكلبه معبد
ما كولن كفر لو قلة أيمان
لاكن مهزله وما ألهه احد
لتلاثه الملاهي مفتحه بالليل
وبالعشرة الجوامع كلهه تنسد
[/size]